സിൽവർ ലൈൻ

കേരളത്തിൻ തീരഭൂമിയിലൂടൊരു 

തീരവികസനപ്പാത വരു,ന്നിനി

തീരുമല്ലോ ദീർഘയാത്ര, വടക്കുനി-

ന്നാരെയും തെക്കോട്ടെടുത്തിടും വൻ റെയിൽ!!

ദൂരമെന്നല്ല ലാഭിച്ചിടാം നമ്മൾക്കു

നേരവുമൊത്തിരിയിപ്പാത വന്നിടിൽ!

തീരാത്ത ഭീതിയിൽ മുങ്ങിനില്ക്കുന്നൊരീ

കേരളഭൂമിയെന്നോടു ചൊല്ലുന്നിതാ:

''തീരെ പ്രതീക്ഷിച്ചിടാതെ നാം നില്‌ക്കെ, ഹാ!

തീരാത്ത ദുഃഖം വിതച്ചുകൊണ്ടെത്തിടാം

തോരാമഴ, വടക്കായ് മഞ്ഞുരുകിയാൽ 

തീരംവിഴുങ്ങി കടൽ കരയ്‌ക്കേറിടാം!

ആരെങ്കിലും തരിമണ്ണിതിൽ കാണുമോ?

ആരിങ്ങു ശേഷിച്ചിടും കേരളീയരായ്?''

കേരളീയർ കാണുമെങ്ങെങ്കിലും കര

കേറിയിറങ്ങി ചരിക്കുവോരാണവർ!

''കേരളീയർ ഭൂരിപക്ഷം കടൽകട-

ന്നേറിയ നാടുകൾ രക്ഷപ്പെടുമ്പോഴും

എൻ രൂപ, മെൻ മൊഴി, യെന്റെ സംസ്‌കാരവും

ആരെങ്കിലും പകർന്നീടുവാൻ കാണുമോ?''