Tuesday, 29 June 2021
Friday, 25 June 2021
ഒഴുക്ക്
ഞാനെതിരായ്ത്തുഴഞ്ഞെങ്ങെങ്ങുമെത്താതെ
കൈകാല്‍ കുഴഞ്ഞു ഞാന്‍ എത്രയും ദുര്‍ബല-
നെന്നോര്‍ത്തു കേണതാം ധാരകള്‍ സര്‍വതും!
ഞാനെതിരാകാതൊഴുകേണ്ടതെന്തിലാം?
''ഏതൊരൊഴുക്കിന്റെയൊപ്പമാം നിത്യവും
ഞാനൊഴുകുന്നതാ ധാര നിന്നുള്ളിലും
ഉണ്ടതില്‍ മുങ്ങുക പൊന്തിക്കിടക്കുക,
ആനന്ദധാരയാമാധാരധാരയൂ-
ടാകാശമേഘമായീടുവാനാം നിന്റെ-
യാഗ്രഹമെങ്കിലുമാഴിയിലെത്തണം!
മോഹങ്ങള്‍ നാമുപേക്ഷിക്കാതിരിക്കുകില്‍
ചാക്രികമാം ഗതി വെണ്‍മേഘമാകുക,
മാരിവില്ലാകുക, കാര്‍മേഘമായ് മാറി,
മാരിയായ്‌പ്പെയ്തു നദീജലമാകുക....!
ധ്യാനമെന്തെന്നറിഞ്ഞാ,ലതു ജീവിത-
ജ്ഞാനലയംതന്നെയാവാ, മതെങ്ങനെ-
യെന്നറിയാന്‍ ഹൃദയാര്‍ദ്രത - പൂര്‍ണത-
യെന്തെന്നറിഞ്ഞിടാ,മെന്‍ ശ്വാസധാരയില്‍
എന്‍ശ്രുതിയില്‍ മുഴങ്ങുന്നോരനാഹത-
മെന്നൊരാലാപനം ശ്രദ്ധിച്ചിരിക്കുക!''
ചിന്താവിലാപങ്ങളെല്ലാമൊഴിഞ്ഞിടാന്‍
ബന്ധുരസങ്കല്പധാരയിലൂടെ നാം
എന്നുമൊഴുകുകുയാണെന്നറിഞ്ഞതില്‍
മുങ്ങിയൊഴുകിയാല്‍പ്പോരുമെന്നോതി നീ!
''ഓര്‍മിക്കണം നാമൊഴുക്കിതില്‍ നീന്തുവോര്‍
നര്‍മമാണെന്തും സസൂക്ഷ്മമായ് കാണുകില്‍!
ഈയൊഴുക്കിന്നെതിര്‍ നീന്തുന്നതില്‍പ്പരം
മായികവിഭ്രാന്തിയെില്ലെന്നു കാണ്മു നാം!
എന്നുമൊഴുക്കിന്നെതിര്‍തുഴഞ്ഞീടുവോര്‍
എങ്ങുമുണ്ടാവുമെന്നാലും, നിനക്കിനി
എന്നുമൊഴുക്കിനൊത്തുള്ള തുഴച്ചിലിന്‍
നിര്‍മമഭാവത്തിലാണാത്മ നിര്‍വൃതി!
വീണ്ടും കടല്‍ജലമാകവെയാഴത്തി-
ലെത്തി മുത്തായിടാന്‍ ആശകള്‍ തീരണം!''
Sunday, 13 June 2021
സിൽവർ ലൈൻ
കേരളത്തിൻ തീരഭൂമിയിലൂടൊരു
തീരവികസനപ്പാത വരു,ന്നിനി
തീരുമല്ലോ ദീർഘയാത്ര, വടക്കുനി-
ന്നാരെയും തെക്കോട്ടെടുത്തിടും വൻ റെയിൽ!!
ദൂരമെന്നല്ല ലാഭിച്ചിടാം നമ്മൾക്കു
നേരവുമൊത്തിരിയിപ്പാത വന്നിടിൽ!
തീരാത്ത ഭീതിയിൽ മുങ്ങിനില്ക്കുന്നൊരീ
കേരളഭൂമിയെന്നോടു ചൊല്ലുന്നിതാ:
''തീരെ പ്രതീക്ഷിച്ചിടാതെ നാം നില്‌ക്കെ, ഹാ!
തീരാത്ത ദുഃഖം വിതച്ചുകൊണ്ടെത്തിടാം
തോരാമഴ, വടക്കായ് മഞ്ഞുരുകിയാൽ
തീരംവിഴുങ്ങി കടൽ കരയ്‌ക്കേറിടാം!
ആരെങ്കിലും തരിമണ്ണിതിൽ കാണുമോ?
ആരിങ്ങു ശേഷിച്ചിടും കേരളീയരായ്?''
കേരളീയർ കാണുമെങ്ങെങ്കിലും കര
കേറിയിറങ്ങി ചരിക്കുവോരാണവർ!
''കേരളീയർ ഭൂരിപക്ഷം കടൽകട-
ന്നേറിയ നാടുകൾ രക്ഷപ്പെടുമ്പോഴും
എൻ രൂപ, മെൻ മൊഴി, യെന്റെ സംസ്‌കാരവും
ആരെങ്കിലും പകർന്നീടുവാൻ കാണുമോ?''
Subscribe to:
Posts (Atom)