ജോസാന്റണി
വിരലുകള്‍ മുറിച്ചൊരു വിരലിനാല്‍,
ഇരു ചെവികളും ഇരു മിഴികളും
തുറന്നുമിത്തിരി തുറന്നടച്ചുമി-
ങ്ങിരുന്നിടുന്നവര്‍ വളര്‍ന്നുവന്നിടില്‍,
കണിനി*യില്‍ വല** വിടര്‍ന്നു നില്ക്കവെ,
വരും തലമുറ വലയിലെയിര!
അവരെയാണു ഞാനിവിടിരിക്കവെ,
കവിതതന്‍ മിഴി തുറന്നുവയ്ക്കവെ,
ഇവിടെയും വല വിലങ്ങിനില്ക്കിലും
ഇവിടെയിന്നിലീനിമിഷബിന്ദുവില്‍
നിറഞ്ഞുനില്ക്കുമൊരമരരൂപമായ്
കുരുവിലെത്തരു സമം ദര്‍ശിക്കുന്നു!
കുരുവിലെത്തരു! അതിനെ വേനലും
മരുവിലെ ജലരഹിത ഭൂമിയും
ഒതുക്കുമെങ്കിലും പ്രതീക്ഷവിട്ടിടാ-
തൊരു പെരുമഴ വരുമൊരിക്കലെ-
ന്നുണര്‍വൊടെന്നുമിങ്ങൊരാത്മബോധമായ്
സ്വയമറിഞ്ഞവര്‍ വരും തലമുറ!
* കണിനി = കമ്പ്യൂട്ടര്‍ (തമിഴ്)
**വല = ഇന്റര്‍നെറ്റ്
No comments:
Post a Comment