'ഒരു ജാതി, ഒരു മതം, ഒരു ദൈവ'മെന്നതിൻ
പൊരുളായൊരരുളുണ്ടു കരുണാലയൻ ഗുരു!
ഗുരുവുമൊന്നേയുള്ളു തിത്തിരിപ്പക്ഷിയും
തരിമണലുപോലുംതരും നമുക്കറിവെന്നൊ-
രറിവിലുള്ളരുളാണു ഗുരു, ഗുരുവിനെത്തിരി-
ച്ചറിയുവാൻ കഴിയുന്ന നിമിഷമാം നിത്യതാ-
ക്ഷണ, മാ ക്ഷണം സ്വീകരിച്ചു ചരിക്കുകിൽ
പദമൂന്നിടുന്നിടം മുക്തിമാർഗത്തിലാം!!
അറിയുന്നു ഞാനിന്നു യാഥാർഥ്യമോരോന്നു-
മറിവിന്റെ ശ്രദ്ധയിൽ ലയമായി മാറവെ
കവിതപോലും ധ്യാനമാർഗ, മെൻ മാനസം
ഇവിടെ നിസ്സംഗമായാൽ മൊഴി ധ്യാനമാം!
മൊഴിയിൽനിന്നും മിഴി, മിഴിയിലോ മഴവില്ലു-
മഴകിന്റെ നൃത്തവും നിറയുന്നു, സർവതും
ഒരു വെണ്മ മാത്രമെന്നറിയുന്ന നിന്നറിവി-
ലിരുളുമരുളേകിടും പൊരുൾ, മൗനസാന്ദ്രത!
